Պրն. Գրիգորյան, Հայաստանի նախագահական ընտրություններից հետո մեզ առաջարկվող գլոբալ խաղացողների ինտեգրացիոն նախագծերի համադրման կամ հակադրման խնդիրն արդիական է դարձել, ինչին նպաստել է նաև Սերժ Սարգսյանի`սկզբում Մոսկվա, հետո Բրյուսել այցը: Ի՞նչ հնարավոր սցենարներ են այստեղ դիտարկվում:

Կարծում եմ, որ նախագահ Սերժ Սարգսյանն ընտրություններից հետո Մոսկվա կատարած իր առաջին այցով ցույց տվեց Հայաստանի ռազմավարական գերակայությունները, և ես կշռադատված և գրագետ քայլ եմ համարում դա: Նրա այցը Մոսկվա որոշակի քաղաքական ժեստ էր պարունակում: Այո, Մոսկվայում, ի թիվս այլ հարցերի, քննարկվել է նաև Մաքսային միության հարցը: Բայց աստեղ ես համաձայն չեմ այն պնդմանը, թե Հայաստանին ստիպում են միանալ այդ կառույցին: Պետք չէ մոռանալ նաև վերջերս մի քանի հեռուստաալիքներով հեռարձակված հարցազրույցում Հայաստանի նախագահ Սերժ Սարգսյանի այն հայտարարությունը, թե Մաքսային միությունում Հայաստանին չեն սպասում: Այդ առնչությամբ միանգամայն հաջող եմ համարում նախագահի այցը Մոսկվա: Ինձ թվում է, որ Մոսկվա կատարած վերջին այցի ընթացքում այդ հարցը քննարկվել է, և հայկական կողմը կարողացել է նշել անհրաժեշտ փաստարկներ այդ կազմակերպությանն անդամակցումը մերժելու օգտին: Իսկ այդ փաստարկները, ըստ երևույթին, Կրեմլին բավարարել են:

Դուք բացառու՞մ եք Մոսկվայի կողմից Հայաստանի համար տնտեսական անհարմարություններ ստեղծելու հնարավորությունը, օրինակ`գազի գնի բարձրացման տեսքով:

Վերջին տարիներին գազի գինը ժամանակ առ ժամանակ բարձրացվում է, և` առանց որևէ քաղաքական նկատառման, հետևաբար, ՙերկնագույն վառելիքը՚ որպես Երևանի նկատմամբ ճնշման գործիք դիտարկելն աննպատակահարմար է: Մենք շատ հաճախ խոսում ենք այն լուրջ և անգնահատելի դերի մասին, որ Հայաստանը խաղում է Ռուսաստանի համար Հարւհավային Կովկասում: Չէ որ հենց Հայաստանն է ապահովում Մոսկվայի ռազմական ներկայությունն այստեղ. մեր տարածքում տեղակայված է ռուսական ռազմակայան: Որպես դաշնակից Հայաստանը Ռուսաստանի համար նոր նշանակություն է ձեռք բերում` Ռուսաստանի կողմից Գաբալայի ՌՏԿ շահագործումը դադարեցնելուց հետո: Գաբալայի փակումը վերջակետ կդնի Ադրբեջանում Ռուսաստանի ռազմական ներկայությանը:

Մաքսային միության հարցում այժմ Ռուսաստանի համար անհամեմատ ավելի կարևոր է Ուկրաինան` իր վիթխարի շուկայով: Այդ պատճառով ճնշում կլինի այնտեղ, այլ ոչ թե այստեղ: Իհարկե, Մոսկվան ամբողջովին հաշվից դուրս չի գցի Հայաստանին: Այստեղ խորհրդաժողովներ կանցկացվեն Մաքսային միության թեմայով, պարբերաբար պատվիրակություններ կժամանեն`փորձելով թեկուզ փորձագիտական հանրությանը համոզել Մոսկվայի ինտեգրացիոն նախագծերին մասնակցության անհրաժեշտության մեջ: Բայց ավելի արմատական միջոցներ, որակական տեղաշարժեր տեսանելի ապագայում չեն սպասվում:

Չնայած, որ Հայսատանի տնտեսությունն այնքան էլ ինտեգրված չէ համաշխարհային շուկաներին, երկիրը չի կարող խուսաթել արտաքին բացասական ազդեցությունից, որը կարող է գալ հիմնականում Եվրոպայից: Այսօր Երևանում կայացած մամուլի ասուլիսում նման կարծիք է արտահայտել, ՀՀ ԱԺ ԲՀԿ խմբակցությունից նախկին պատգամավոր, տնտեագետ Վարդան Բոստանջյանը:

ՙՄենք չենք կարող խուսափել արժույթի տատանումներից և դոլարի փոխարժեքի աճից, քանի որ Հայաստանի տնտեսության դոլարիզացիայի մակարդակը շատ բարձր է, իսկ ֆինանսական իշխանությունների զսպող կառույցները բավականաչափ հզոր չեն` այն իջեցնելու համար՚,-նշել է Վ.Բոստանջյանը:

Նրա խոսքերով, դոլարիզացիայի մակարդակի վրա ազդում է նաև դոլարի նկատմամբ բարձր պահանջարկը, ինչն իր հերթին պայմանավորված է երկրում ընտրական գործընթացներով, ինչպես նաև դրա հետ կապված գործարար շրջանների որոշակի ակտիվացումով, որոնք հիմնականում աշխատում են դոլարով: Բացասական գործոնների շարքում տնտեսագետը նշել է բնակչության մշտական միգրացիան, որը բերում է մասնավոր տրանսֆերտների ներհոսքի աճին: Նա հիշեցրել է, որ 2012 թվականին այդ ցուցանիշը, ՀՀ բանկային համակարգով, կազմել է մոտ 1.7 մլրդ.դոլար, իսկ ոչ պաշտոնական աղբյուրների միջոցով` մոտ 3.5 մլրդ.դոլար: Իր մեջ զգալի վտանգ է պարունակում նաև Հայաստանից կապիտալի արտահոսքի ծավալների ավելացումը, ինչը պայմանավորված է հայրենական գործարարների կողմից ներդրումներ կատարելու հետ կապված դժվարություններով:

Բոստանջյանը նշել է նաև, որ ՀՀ Կենտրոնական բանկն ամեն ինչ անում է գները կայունությունն ապահովելու համար, առավելագույնս օգտագործելով իր տրամադրության տակ գտնվող գործիքները, այդ թվում կիրառելով նաև արժութային միջամտություններ: ՙԵս հասկանում եմ, որ արժութային միջամտությունները փոխարժեքի տատանումների դեմ պայքարի ամենալավ միջոցը չէ, բայց մեզ համար այն ամենաընդունելին է՚,-նշել է տնտեսագետը: Նա նշել է, որ մեգառեգուլյատորն ի վիճակի չէ միայնակ լուծել այդ պրոբլեմները, քանի որ գների աճը հանդիսանում է տնտեսական քաղաքականության արդյունք և ԿԲ միջոցառումները կարող են արդյունավետ լինել միայն դրամավարկային և հարկաբյուջետային համակարգված և հիմնավորված քաղաքականությունների առկայության պայմաներում:

ՀՀ ԿԲ տվյալներով, Հայաստանի տնտեսության դոլարիզացիայի մակարդակն 2013 թվականի հունվարի 1-ի դրությամբ կազմել է 45%, տարեկան կտրվածքով աճելով 3.2 տոկոսային կետով:

 Մինչև ապրիլի 9-ին նախագահի երդմնակալության արարողությունը Հայաստանի հետընտրական ներքաղաքական իրավիճակի կարգավորումը բխում է ինչպես իշխանությունների, այնպես էլ ընդդիմության շահերից, քանի որ հասարակությունում պառակտումը ոչ ոքի պետք չէ: Այդ մասին այսօր մամլո ասուլիսի ժամանակ հայտարարել է ՙԱզատ դեմոկրատներ՚ կուսակցության անդամ Ալեքսանդր Արզումանյանը:

Ըստ որում, նա դրական է համարել այն փաստը, որ կողմերի միջև ծավալվել է թեկուզ նամակագրական, բայց երկխոսություն: Նրա խոսքով, այժմ անհրաժեշտ է ընդդիմության դերի ինստիտուցիոնալացում, ինչն իշխանության կառուցվածքում արմատական փոփոխությունների իրականացման երաշխիք կլինի: ՙԱնհրաժեշտ է պաշտպանել քաղաքացիների այն 37%-ի շահերը, ովքեր քվեարկել են գործող վարչակարգի դեմ` հատկապես, եթե հաշվի առնենք, որ դա ձայների բավականին մեծ քանակություն է: Իշխանությունները պետք է հասկանան, որ անհնար է ևս 5 տարի կառավարել`աշխատանքի իմիտացիա անել, փոփոխություններն անխուսափելի են՚,- նշել է Արզումանյանը:

Նրա խոսքով, վարչապետին փոխելն էական խնդիրներ չի լուծի, քանի որ հարցն անձերի մեջ չէ, այլ`համակարգի: ՙՀարկավոր են համակարգային փոփոխություններ, իսկ գործող վարչապետն ունի բոլոր անհրաժեշտ պրոֆեսիոնալ որակներն իր պարտականությունները կատարելու համար՚,- հայտարարել է Արզումանյանը:

 ՙՄենք պետք է աշխուժացնենք Լեռնային Ղարաբաղի հակամարտության կարգավորմանն ուղղված ջանքերը՚: Ըստ APA-ի, այդ մասին հայտարարել է Ադրբեջանում ԱՄՆ դեսպան Ռիչարդ Մորնինգսթարը Գուբա կատարած այցի ժամանակ:

Նրա ասելով, ԱՄՆ ԵԱՀԿ Մինսկի խմբի շրջանակում հնարավորինը կանի Լեռնային Ղարաբաղի հակամարտությունը խաղաղ ճանապարհով լուծելու համար: ՙԵս գիտեմ, թե որքան բարդ է այդ հակամարտությունը: Այլապես այդ հակամարտության կարգավորումը 20 տարի չէր պահանջի: Մենք պետք է ակտիվացնենք ջանքերն այդ ուղղությամբ: Ես և Մինսկի խմբի ամերիկյան համանախագահը կշարունակենք համատեղ աշխատանքը Ադրբեջանի պաշտոնական անձանց հետ` հակամարտության կարգավորման համար նոր գաղափարներ առաջ քաշելու նպատակով՚, - ամփոփել է նա:

Երևանի առևտրային բանկերից ԱրմԻնֆո գործակալությանը տրամադրված տվյալների համաձայն, տարադրամի փոխանակման բանկային կետերում այսօր ԱՄՆ դոլարի առքի առավելագույն գինը կազմել է 419 դրամ 1 դոլարի դիմաց, եվրոյի առքի առավելագույն գինը` 535 դրամ 1 եվրոյի դիմաց, իսկ ռուսական ռուբլու առքի գինը`13,5 դրամ 1 ռուբլու դիմաց: ԱՄՆ դոլարի վաճառքի նվազագույն գինը կազմել է 420 դրամ 1 դոլարի դիմաց, եվրոյի վաճառքի գինը կազմել է 536,5 դրամ 1 եվրոյի դիմաց, իսկ ռուսական ռուբլու վաճառքի գինը`13,5 դրամ 1 ռուբլու դիմաց:

Երևանը կանաչ տարածքների քանակով զիջում է, գործնականում, ԱՊՀ բոլոր մայրաքաղաքներին: Այդ մասին հայտարարել է Հայաստանի ճարտարապետների միության ղեկավար Մկրտիչ Մինասյանը մարտի 28-ին կայացած մամուլի ասուլիսում:

Նրա ասելով, եթե խորհրդային տարիներին մայրաքաղաքում մեկ մարդուն բաժին էր ընկնում 14 քմ կանաչ տարածք, ապա այսօր այդ ցուցանիշը նվազել է մինչև 3 քմ: Ինչպես նշվել է, դրա պատճառները հարկավոր է  փնտրել Երևանի ակտիվ կառուցապատման մեջ, որը  հաճախ իրականացվում է քաղաքաշինության նորմերի խախտումներով: Մինասյանն ընդգծել է, որ իրավիճակը չի փրկի նույնիսկ Փոքր կենտրոնի կառուցապատման ավելի վաղ ընդունված հայեցակարգը, քանի որ այդ փաստաթուղթը փոքր-ինչ ուշացել է: ՀՃՄ ղեկավարն ուշադրություն է հրավիրել այն հանգամանքի վրա, որ Համագործակցության երկրների շատ քաղաքներ ավելի խնամքով են վերաբերվում կանաչ տեղամասերի պահպանմանը, քան` Երևանը:

Ավելի վաղ Երևանի քաղաքապետարանը հաղորդել էր ընթացիկ տարում Երևանում  50 հազար ծառ տնկելու իր ծրագրերի մասին: Ընդհանուր առմամբ, քաղաքապետարանը մտադիր է 1,7 մլրդ դրամ հատկացնել կանաչապատման աշխատանքներին:

 Հայաստանը ներառվել է ՙԵվրատեսիլ-2013՚ մասնակիցների վարկանշային աղյուսակի առաջատարների եռյակում : Այս տարի հանրապետությունը ներկայացնելու պատիվը բաժին է ընկել Գոռ Սուջյանին և Dorians ռոք-խմբին, ովքեր հանդես կգան Lonely planet երգով: Բառերի հեղինակն է հայտնի բանաստեղծ-երգահան Վարդան Զադոյանը, իսկ երաժշտությունը գրել է Black Sabbath-ի լեգենդար կիթառահար Թոնի Այոմին: escrating.ru վարկանշային աղյուսակը կազմվում է տեսահոլովակների գնահատման հիման վրա, որոնք գտնվում են YouTube-ում Եվրատեսիլի պաշտոնական ալիքում: Ընդ որում վարկանշային աղյուսակը թարմացվում է ամեն օր: Պորտալում զետեղված տեղեկատվության համաձայն, առաջին տեղն զբաղեցնում է Չեռնոգորիան, իսկ երկրորդը` Դանիան:

Շինարարական աշխատանքները Ծածկած շուկայում շարունակվում են, հաղորդել է  Հայաստանի ճարտարապետների միության ղեկավար Մկրտիչ Մինասյանը մարտի 28-ի մամուլի ասուլիսում:

Նա հիշեցրել է, որ Մշակույթի նախարարության և Երևանի քաղաքապետարանի որոշմամբ Ծածկած շուկայի հետևի մասի ապօրինի կառույցը պետք է ապամոնտաժվեր: Սակայն արդյունքում ստեղծվել է հակառակ իրավիճակ. Մինասյանի ասելով, իրականում, շինարարական աշխատանքները տվյալ տեղամասում շարունակվում են: ՙՍտեղծվել է անհեթեթ իրավիճակ: Հարց է ծագում. Ծածկած շուկայի սեփականտերը որքանով է հաշվի առնում քաղաքապետարանի և Մշակույթի նախարարության կարծիքը՚, - ասել է նա:

Հիշեցնենք, որ շատերը Ծածկած շուկայի անպատիժ ոչնչացման հանգամանքը պայմանավորում են դրա սեփականատիրոջ` օլիգարխ-պատգամավոր    Սամվել Ալեքսանյանի անձով:

 ՀՀԿ գործադիր մարմինն այսօր ուշ երեկոյան կայանալիք նիստում կքննարկի մի շարք արդիական ներքաղաքական և ներկուսակցական հարցեր: Այդ մասին ԱրմԻնֆոյի թղթակցի հետ զրույցում հայտարարել է ՀՀԿ մամուլի քարտուղար Էդուարդ Շարմազանովը: Նա հերքել է ԶԼՄ-ների այն տեղեկատվությունը, թե գործադիր մարիմնի նիստում ՀՀԿ կքննարկի ՙԺառանգություն՚ կուսակցության հետ կառավարող կոալիցիա ստեղծելու հարցը: Նրա ասելով, այսօրվա ԳՄ նիստում, ինչպես նաև մյուս բոլոր նիստերում, կքննարկվեն արդիական ներքաղաքական և ներկուսակցական հարցեր, ինչպես նաև Երևանի ավագանու խորհրդի ընտրություններին նախապատրաստման հարցեր:

 Մարտի 27-ին Երևանում ընթացել է ՙԱրտավազդ՚ ամենամյա մրցանակաբաշխությունը:

ՙՏարվա լավագույն ներկայացում՚ անվանակարգում մրցանակի են արժանացել ՙՄորգանի խնամին՚ (Պարոնյանի անվան երաժշտական թատրոն) և ՙԱբգար դպիրը՚ (Վանաձորի Աբելյկանի անվան դրամատիկական թատրոն):

Լավագույն ռեժիսուրայի համար մրցանակը կիսել են Ալեքսանդր Գրիգորյանը ՙԲադի որսը՚ և ՙՖիլումենա Մարտուրանո՚ ներկայացումների համար (Կ. Ստանիսլավսկու անվ. պետ. ռուսական դրամատիկական թատրոն) եւ Հակոբ Ղազանչյանը` ՙՆապոլեոն Կորկոտյանի՚ (Հ. Պարոնյանի անվ. երաժշտական կոմեդիայի թատրոն) և ՙՎիրուս՚ (Երևանի Պատանի հանդիսատեսի թատրոն) ներկայացումների համար:

Լավագույն տղամարդ դերակատար է ճանաչվել Երվանդ Ենգիբարյանը ՙԲադի որսը՚ նրկայացման դերակատարման համար և Դավիթ Հակոբյանը` ՙԿարոտ՚ բեմադրությունում (Հ.Մալյանի անվան թատրոն): ավագույն կին դերակատար` Լուիզա Ղամբարյան (ՙՌոմանտիկ կոմեդիա՚, Հ. Ղափլանյանի անվան դրամատիկական թատրոն): ՙԼավագույն երիտասարդական ներկայացում՚ անվանակարգում հաղթել է Արշալույս Հարությունյանը ՙՍկոտչ և Վիսկի՚ ներկայացման համար (Երևանի Կամերային պետ. թատրոն): Լավագույն երիտասարդ բեմադրիչ` Սամսոն Մովսեսյանը ՙԱլիսան հրաշքների աշխարհում՚ ներկայացման համար (Երևանի Հ. Թումանյանի անվ. պետ. տիկնիկային թատրոն):  Լավագույն երիտասարդ դերասանուհի է ճանաչվել Անի Գրիգորյանը` ՙՊարոնայք, ամեն ինչ կործանվում է, բայց դեռ կարելի է ապրել և զվարճանալ՚ ներկայացման դերակատարման համար: Լավագույն երիտասարդ դերասան` Արմեն Մարգարյանը ՙԿրքոտ հաշվետվություն՚ ներկայացման մեջ:

Լավագույն սցենոգրաֆիայի համար մրցանակի է արժանացել Վահագն Թևանյանը ՙՌոմանտիկ կոմեդիայի՚ (Հ. Ղափլանյանի անվան դրամատիկական թատրոն) և ՙՄորգանի խնամին՚ (Հ. Պարոնյանի անվ. երաժշտական կոմեդիայի թատրոն) ներկայացումների համար: Երաժշտության լավագույն հեղինակ է ճանաչվել Արամ Սաթյանը ՙՄորգանի խնամին՚ (Հ. Պարոնյանի անվ. երաժշտական կոմեդիայի թատրոն) ներկայացման երաժշտության համար: Լավագույն պիես է ճանաչվել Սամվել Խալաթյանի ՙՊադամ, պադամ, պադամ...՚ ներկայացումը: Երկրորդ պլանի լավագույն տղամարդ դերակատար` Սերգեյ Թովմասյան (ՙՀացի խնդիր՚, Համազգային թատրոն):

Երևան:  ԱրմԻնֆո: Թբիլիսիում կայացել է Ուկրաինայի էներգետիկայի և քարածխի արդյունաբերության նախարար Էդուարդ Ստավիցկու հանդիպումը Վրաստանի փոխվարչապետ, էներգետիկայի և բնական պաշարների նախարար Կախա Քալաձեի հետ: Ինչպես նշվում է Ուկրաինայի էներգետիկայի և քարածխի արդյունաբերության նախարարության մամուլի հաղորդագրության մեջ, հանդիպման ընթացքում նշվել է էներգետիկայի ոլորտում ուկրաինավրացական համագործակցության զարգացման լիովին չօգտագործված ներուժի առկայության մասին: Էդուարդ Ստավիցկին հայտարարել է, որ Ուկրաինան պաշտպանում է Վրաստանի ծրագրած գազափոխադրման նախագծերը և շահագրգռված է դրանց իրագործմամբ: Նրա ասելով, Ուկրաինան շահագրգռված է նաև Տրանսանատոլիական գազամուղի նախագծի իրագործմամբ, որի գործարկումը թույլ կտա զգալիորեն ավելացնել Վրաստանի տարածքով բնական գազի տարանցման ծավալները: Խոսքը վերաբերում է Ուկրաինայի գազափոխադրման համակարգի գործարկմանը Վրաստանի տարածքով դեպի Եվրոպա գազամատակարարման նպատակով: Հանդիպման վերջում կողմերը պայմանավորվել են գործուն երկխոսություն վարել էներգետիկայի ուղղությամբ և արագացնել համատեղ նախագծերի իրագործումը:

Երևան: ԱրմԻնֆո:  Ադրբեջան-Թուրքիա-Վրաստան հերթական գործարար համաժողովը տեղի կունենա մայիսի 21-ին Գաբալայում` երեք երկրների նախարարների և գործարար շրջանակների մասնակցությամբ: Ինչպես հաղորդել է Ադրբեջանի տնտեսական զարգացման նախարարությունը, երրորդ անգամ կազմակերպվող եռակողմ գործարար համաժողովի շրջանակներում կքննարկվեն տնտեսական համագործակցության և կապերի ընդլայնման հեռանկարները: Նախորդ հանդիպումները տեղի են ունեցել Թբիլիսիում և Կարսում:

Աղբյուրի հավաստմամբ, 2012  թվականի արդյունքների համաձայն, Ադրբեջանի և Թուրքիայի միջև ապրանքաշրջանառությունը կազմել է 2,12 մլրդ դոլար: Ընդ որում ըստ ներմուծման ծավալի Թուրքիան 15,75 տոկոս տեսակարար կշռով առաջին տեղն է զբաղեցնում Ադրբեջանի արտաքին առևտրի գործընկերների շրջանում: Ադրբեջանի և Թուրքիայի միջև փոխադարձ ներդրումների ծավալը գերազանցում է 10 մլրդ դոլարը: Ադրբեջանական կապիտալով ընկերությունների թիվը Թուքիկայում հասել է 1,1 հազարի: Ադրբեջանի և Վրաստանի միջև արտահանման-ներմուծման գործառնությունները նախորդ տարվա արդյունքներով կազմել են 700,66 մլն դոլար: Այսօրվա դրությամբ Ադրբեջանը երկրորդ տեղն է զբաղեցնում Վրաստանի տնտեսությունում ուղիղ ներդրումների ծավալով, և ադրբեջանական ներդրումները կազմում են Վրաստանում բոլոր ուղիղ ներդրումների 12 տոկոսը: Միայն անցյալ տարի Վրաստանում գրանցվել է ադրբեջանական մասնակցությամբ 134 ձեռնարկություն, և դրանց ընդհանուր թիվն արդեն անցնում է 500-ից: -գ-

Երևան:  ԱրմԻնֆո: ԱՄՆ պետդեպարտամենտը տարածել է հայտարարություն, որում Վրաստանի իշխանություններին և ընդդիմությանը շնորհավորել է երկրի խորհրդարանում սահմանադրական փոփոխությունների ընդունման առնչությամբ, որոնք առնչվում են բարձրագույն օրենսդիր մարմնի լուծման դեպքում միանձնյա նախարարների կաբինետ նշանակելու  նախագահի իրավունքի սահմանափակմանը:

Ինչպես հաղորդում է ՙԲլաք Սի Պրեսը՚, նախօրեին նախագահ Միխայիլ Սահակաշվիլին ստորագրել է մարտի 25-ին Վրաստանի խորհրդարանի ընդունած սահմանադրական փոփոխությունները, որոնք ուժի մեջ կմտնեն երկրի Արդարադատության նախարարության օրենսդրական տեղեկատուի կայքում հրապարակումից հետո:

Աղբյուրի համաձայն, ԱՄՆ Պետդեպարտամենտը դրական է գնահատել ՙքաղաքական փոխհամաձայնությունը, որը դարձել է այդ համաձայնության հիմքը՚:  ՙԱՄՆ շնորհավորում է Վրաստանի ղեկավարությանը, խորհրդարանի մեծամասնությանն ու փոքրամասնությանը: Դա կարևոր քաղաքական որոշում է: Այն ճանապարհ կհարթի Վրաստանում ժողովրդավարության ամրապնդման համար և կառավարությանը հնարավորություն կընձեռի կենտրոնանալ իշխանությունների առջև ծառացած բազմաթիվ խնդիրների վրա՚, - ասվում է Պետդեպարտամենտի հայտարարությունում: Ընդ որում Պետդեպարտամենտը Վրաստանի քաղաքական ուժերին կոչ է արել պահպանել ՙկառուցողական տոնը՚ հրապարակային քննարկումներում` հաշվի առնելով երկրի քաղաքացիների շահերը:

Աղբյուրը նաև հաղորդում է, որ Եվրամիության դիվանագիտության ղեկավար Քեթրին Էշթոնը և ընդլայնման ու հարևանության եվրոպական քաղաքականության գծով եվրահանձնակատար Շտեֆան Ֆյուլեն նույնպես տարածել են հայտարարություն, որում դրական են գնահատել Վրաստանի խորհրդարանի վերը նշված սահմանադրական փոփոխությունը:

 Հայաստանը պետք է առավելագույնս օգուտ քաղի խոշոր խաղացողների կողմից առաջարկվող բոլոր ինտեգրացիոն նախագծերից, լինի դա ռուսաստանը կամ Եվրամիությունը: Այս մասին այսօր Կովկասի ինստիտուտում կայացած կլոր սեղանի ընթացքում հայտարարել է Արտակարգ և Լիազոր դեսպան Արման Նավասարդյանը:

Նրա խոսքերով, ժամանակին, անկախության կայացման ընթացքում, հայկական դիվանագիտությունը հաջողություններ չունեցավ մի շարք կենսական խնդիրներում, դուրս մղվելով տարածաշրջանային բազմաթիվ ծրագրերից: Իրավիճակն ավելի սրվեց Թուրքիայի և Ադրբեջանի կողմից իրականացված տրանսպորտային և տնտեսական շրջափակումով: ՙՀետագա զարգացման նպատակով մեր երկիրը պետք է մասնակցի հնարավոր բոլոր նախագծերին: Այդ առումով էլ, ինչպես եվրաինտեգրումը, այնպես էլ մասնակցությունը Ռուսաստանի կողմից նախաձեռնված նախագծերին, լավ հնարավորություն են Հայաստանի համար,  կենսական կարևորագույն խնդիրների լուծման ընթացքում՚,-նշել է Նավասարդյանը:

Նա նաև հավելել է, որ հայկական դիվանագիտությունը կարող է, և պարտավոր է, ըստ սեփական շահերի համակցել նշված երկու արտաքին քաղաքական վեկտորները, տանելով ճկուն քաղաքական գիծ:

Իշխանի բնական վերարտադրությունը Սևանա լճում փորձագետները շարունակում են համարել անբավարար:

Այսօր Երևանում կայացած մամուլի ասուլիսում Սևանի հիմնահարցերի Հանձնաժողովի ղեկավար Վլադիմիր Մովսիսյանը ներկաների ուշադրությունն է հրավիրել այն հանգամանքին, որ վերջին 10 տարիներին Սևան է գցվել իշխանի 1.8 մլն.շերեփուկ ¥գեղարքունիի և բախտակի տեսակներ¤: ՙԲայց մենք չենք կարող արհեստականորեն անվերջ պահպանել իշխանի պոպուլյացիան: Ներկայումս բնական վերարտադրություն, գործնականում, չկա, քանի որ Սևան լցվող գետերը կեղտոտված են, կամ էլ դրանց վրա գործում են փոքր ՀԷԿ-եր՚,-նշել է նա: Նրա խոսքերով, ներկայումս Սևան լցվեղ գետերի վրա գործում է 8 հիդրոէլեկտրակայան: ՙՄենք առաջարկում ենք` կամ ձվադրման ժամանակահատվածում արգելել այդ փոքր ՀԷԿ-երի աշխատանքը, այսինքն ապրիլից մինչև հունիսը, կամ էլ պարտադրել` որպեսզի տեղադրվեն ձկնամիջանցքներ՚,-հայտարարել է Մովսիսյանը:

Իր հերթին, ԱրմԻնֆո գործակալության հետ զրույցում ՀՀ ԳԱԱ Կենդանաբանության և հիդրոէկոլոգիայի գիտական կենտրոնի տնօրեն Բարդուխ Գաբրիելյանը նշել է ևս մեկ պրոբլեմ, որը խոչընդոտում է իշխանի պոպուլյացիայի աճին` դա ձկան որսագողությունն է: Նրա խոսքերով, սեռական հասունության շրջանին հասած իշխանը պարզապես որսվում է դեռ գետերում, ձվադրման ճանապարհին: ՙԳետերի ակունքներում դրվում են ծուղակներ, ցանցեր, և ոչ մի ձուկ, գործնականում, չի հասնում ձվադրմանը՚,-նշել է փորձագետը:

Նրա խոսքերով, ձվադրման մեծ գետերը գտնվում են վատթար վիճակում, որոնց մի մասն ամռանը չորանում է, ինչը խախտում է էկոլոգիական ողջ համակարգը, իսկ մյուս գետերն անցնում են ՀԷԿ-երի տուրբիններով: Բացի այդ, գետերի ջրերի մի մասը լցվում է ավազաններ, որտեղ աճեցվում է ծիածանափայլ իշխան, որը հանդիսանում է գիշատիչ, հետևաբար, փորձագետները կոչ են անում Սևանի ավազանում արգելել դրանց բազմացումը:

ՙՊետությունն ամեն տարի միջոցներ է հատկացնում իշխանի պոպուլյացիան համալրելու նպատակով: Մի կողմից, դա ողջունելի է, իսկ մյուս կողմից` այդ քայլերն արդյունավետ չեն, քանի որ հատկացվող գումարները վերջին հավով նստում են ձկնագողերի գրպաններում, որոնք որսում են ձուկը, թույլ չտալով կատարել ձվադրում՚,-նշել է Գաբրիելյանը:

 Սևանա լճի բացասական հաշվեկշռի պատճառ է դարձել 2012 թվականի մեծածավալ ջրառը: Այդ մասին հայտարարել է Սևանի հիմնարար հարցերի հանձնաժողովի ղեկավար Վլադիմիր Մովսիսյանը մարտի 27-ի մամուլի ասուլիսում:

Նա նշել է, որ 2013 թվականի հունվարի 1-ի տվյալներով, լճի մակարդակը 3 սմ ցածր է 2012 թվականի նույն ժամանակաշրջանի ցուցանիշների համեմատ: Այսօրվա դրությամբ Սևանի մակարդակը կազմում է 1900 մ 18 սմ: Մովսիսյանը հիշեցրել է, որ նախորդ տարի որոշում էր կայացվել լճից ջրառը 170 մլն խմ-ից մինչև 323 մլն խմ ավելացնելու մասին: Ընդ որում, ինչպես նշվել է, հանձնաժողովը հանձնարարել էր ջրառն իրականացնել 280 մլն խմ ծավալով:

Փորձագետը նշել է, որ մեծածավալ ջրառի պատճառ է դարձել Արարատյան հարթավայրում ծագած բարդ իրավիճակը: Այստեղ ստորգետնյա ջրերի վերականգնվող պաշարը կազմում է 1.226 մլրդ խմ, սակայն Բնապահպանության նախարարությունը ձկնային տնտեսություններին թույլ է տվել 1.496 մլրդ խմ չափով ջրօգտագործում: Այդ քայլը որակելով անպատասխանատվության արդյունք` Մովսիսյանն ուշադրություն է հրավիրել այն հանգամանքի վրա, որ արդյունքում` հարթավայրի 638 արտեզյան հորերից 122-ը ցամաքել է, և 6200 հա հող մնացել է, գործնականում, առանց ջրի:

Խոստովանելով, որ Բնապահպանության նախարարությունում ոչ ոք այդպես  էլ պատասխանատվության չի ենթարկվել ճակատագրական որոշման համար, փորձագետը հաղորդել է, որ հանձնաժողովը հանդես է եկել ստորգետնյա աղբյուրների օգտագործումն արգելելու առաջարկությամբ, կամ էլ ձկնային տնտեսություններում ջրօգտագործման կիսափակ ցիկլ կիրառել, ինչի արդյունքում նրանք տարեկան կսպառեն առավելագույնը 450 մլն խմ ջուր, այսինքն, մի քանի անգամ պակաս` քան այժմ:

 ՀՀ նախագահի մամլո խոսնակ Արմեն Արզումանյանը պատասխանել է ՙԺառանգություն՚ կուսակցության առաջնորդ Րաֆֆի Հովհաննիսյանի նամակին: ՀՀ նախագահի մամլո խոսնակի`ԱրմԻնֆո ստացված հայտարարության մեջ, մասնավորապես, նշվում է.

ՙՙԺառանգություն՚ կուսակցության ղեկավար Րաֆֆի Հովհաննիսյանի՝ մարտի 26-ին ՀՀ նախագահ Սերժ Սարգսյանին հասցեագրված նամակի վերաբերյալ հարկ է արձանագրել երեք հանգամանք. Նախագահ Սերժ Սարգսյանը մշտապես աչքի է ընկել մեծ համբերատարությամբ, և նա միշտ կառուցողական է իր քայլերում, Նախագահի՝ ս. թ. մարտի 25-ի նամակում արված առաջարկությունը դեռ շարունակում է մնալ ուժի մեջ՝ չնայած հրապարակից հնչող անհիմն վերջնագրերի լեզուն ժամ առ ժամ նվազեցնում է դրա արդիականությունը, Նախագահի հանդիպումները կազմակերպվում են վաղօրոք պլանավորված արարողակարգով, կանխավ ամրագրված ժամերի և տեղի են ունենում նախագահական նստավայրում՚:
 
Սարգսյանի և Հովհաննիսյանի միջև նամակագրական շփումն սկսվել է այն բանից հետո, երբ մարտի 22-ին Հովհաննիսյանը հայտարարել էր, որ համաձայն է ընդունել Սերժ Սարգսյանի նախագահությունը` պայմանով, որ կանցկացվեն արտահերթ խորհրդարանական ընտրություններ` այս տարվա ընթացքում: Մինչ այդ պահանջել է Ընտրական օրենսգրքում իրականացնել փոփոխություններ. վերացնել մեծամասնական ընտրակարգը՝ թողնելով բացառապես համամասնականը, թույլատրել ընտրած քաղաքացիների ցուցակների հրապարակումը, վերականգնել քաղաքական-կուսակցական սկզբունքը Կենտրոնական ընտրական եւ ընտրատարածքային ընտրական հանձնաժողովների ձեւավորման համար, դրսում ապրողների քվեարկության ապահովում կամ էլ ընտրացուցակներից նրանց հանում: Բացի այդ, պահանջել է ընդդիմությանը զիջել 8 հիմնական պորտֆելները `ՀՀ դատախազություն, Հարկային և մաքսային պետական ծառայություն, Ազգային անվտանգության ծառայություն, Արտգործնախարարություն,  Կրթության եւ գիտության նախարարություն, ԱԺ վերահսկիչ պալատ, Արդարադատության խորհուրդ, Հակակոռուպցիոն հանձնաժողով:

Իր պատասխան նամակում Սերժ Սարգսյանը գրել էր. ՙՈրքան էլ ինձ հասցեագրված գրավոր նյութը հեռու է պետության և պետական իշխանության ձևավորման վերաբերյալ պատշաճ պատկերացումներից և ուղղակիորեն հակասում է գործող սահմանադրական կարգավորումներին, այն, այդուհանդերձ, կարող է օգնել արդյունավետ երկխոսություն սկսելու համար: Ինձ ուրախացնում է, որ Դուք ունեք նաև ուժեղ ընդդիմությանը հարիր լուրջ վերահսկողական գործառույթների ստանձնման պատրաստակամություն, և այդ հարցում մեր կարծիքները կարծես բավականաչափ մոտ են: Ես վստահ եմ, որ եթե մենք սկսենք միասին նպատակադրված աշխատել, հիմնվելով պատկերացումների ընդհանրությունների վրա, հաստատապես արդյունքի կհասնենք: Իմ հորդորն է Ձեզ՝ դադարեցրեք խնդրում եմ հացադուլը, մեկ-երկու օր կազդուրվեք և մենք միասին, թուղթ ու գրիչով, հանգիստ, առանց շոուների սկսենք աշխատել, լուրջ աշխատել՝ անգամ հիմք ընդունելով հենց Ձեր կողմից առաջարկված, այս պահին թեկուզև շատ հում, շարադրանքը՚: Այնուհետև կրկին հաջորդել էր Հովհաննիսյանի պատասխանը. ՙԴրական եմ գնահատում, որ Դուք վերջապես ուղղակի գրությամբ պատասխանեցիք իմ համալիր առաջարկին: Թեեւ նամակի ընդհանուր ձեւակերպումներում նկատելի են որոշ վիճարկելի փաստարկներ եւ կանխակալ համոզումներ, այդուհանդերձ առաջխաղացում կարելի է համարել հանգամանքը, որ Դուք պատրաստ եք բանակցությունների հիմք ընդունել իմ ներկայացրած փաստաթուղթը: Վերահաստատում եմ իմ պատրաստակամությունը` հանդիպելու Ձեզ եւ սեղանին դրված համազգային հանգուցալուծումը քննարկելու ցանկացած ժամի ու ցանկացած ձեւաչափով` Ազատության հրապարակում՚:

 Սևանի առափնյա անօրինական կառույցները կապամոնտաշվեն, անկախ այն բանից, թե ում են պատկանում: Այս մասին այսօր կայացած մամուլի ասուլիսում հայտարարել է Սևանի հիմնահարցերի գծով Հանձնաժողովի ղեկավար Վլադիմիր Մովսիսյանը:

Նա նշել է, որ, ընդհանուր առմամբ, ծովի մակարդակից 1905 մետրից ցածր են գտնվում 4717 շինություններ, որոնց 27%-ը քարից են: Մովսիսյանի խոսքերով, ներկայումս ապամոնտաժվել է 451 շինություն, իսկ այս տարի նույն բախտին կարժանանան ևս 177 շինություն: Բացի շինություններից, Սևանի մակարդակը մինչև 1905 մետր բարձրացնելուց հետո, ջրի տակ կհայտնվեն նաև 4 հազ.հեկտար անտառներ ու թփուտներ: Լճի մակարդակի բարձրացման ծրագրի մեկնարկից ի վեր թփուտներից ու ծառերից մաքրվել է առափնյա 1113 հա տարածք, իսկ 2013 թվականին նախատեսվում է մաքրել ևս 112 հա տարածք:

Սևանի մակարդակի բարձրացման ծրագիրը մեկնարկել է 2002 թվականին: Մինչև 2030 թվականը նախատեսվում է լճի մակարդակը բարձրացնել 6 մետրով: Նախորդ 11 տարիներին հաջողվեց լճի մակարդակը բարձրացնել 3.78 մետրով: Ներկայումս շարունակվում է Արփա-Սևան թունելի 3.5 կմ հատվածի վերանորոգումը, իսկ վերականգնման աշխատանքների ընդհանուր արժեքը կազմում է 11.8 մլրդ.դրամ: Սպասվում է, որ դրանք կավարտվեն 3-4 տարուց, որից հետո Սևանը թունելի միջոցով տարեկան կստանա 290 մլն.խոր.մետր ջուր:

Վերջին մի քանի շաբաթում Զատիկի հայկական սեղանի ուտելիքները թանկացել են 10%: Այսօր Երևանում կայացած մամուլի ասուլիսում նման կարծիք է արտահայտել Հայաստանի սպառողների ասոցիացիայի նախագահ Արմեն Պողոսյանը, հավելելով, որ Հայաստանի Տնտեսական մրցակցության պաշտպանության պետական հանձնաժողովը չի արձագանքել միջոցառմանը մասնակցելու առաջարկին:

Ըստ Պողոսյանի, ձվի գները 50-60 դրամից բարձրացել են մինչև 76 դրամ: Թանկացել է նաև ձուկը և կանաչին: Նա գտնում է, որ շուկայում կատարվող նախատոնական սպեկուլյացիաները պետք է կանխի ՊԵԿ-ը, հարկելով սպեկուլյատիվ շահույթը: Նրա կարծիքով, գյուղատնտեսական շուկաներում սպեկուլյացիան կարելի է արմատախիլ անել մեծածախ առևտրի և մթերումների մեխանիզմների ստեղծման միջոցով, ինչը թույլ կտա վերացնել միջնորդների ազդեցությունը, որոնք թելադրում են գները գյուղատնտեսական շուկաներում: Պողոսյանը նշել է, որ Հանձնաժողովը նույնպես չի արձագանքել գների հետ կապված նախատոնական սպոկուլյացիաներին:

Հիշեցնենք, որ մարտի 13-ին ՏՄՊՊՀ սկսեց ձվի շուկայի ուսումնասիրությունը, ինչի արդյունքում խոշոր արտադրողներն ու սուպերմարկետներն զգուշացվեցին` ձվի գներն անհիմն բարձրացնելու անթույլտրելիության կապակցությամբ: Նրա խոսքրեով, այնուհետև արտադրողները ներկայացրեցին իրենց հիմնավորումները, ինչը նույնպես քննարկվեց Հանձնաժողովի կողմից: Ուսումնասիրվեց նաև խոշոր ձկնաբուծական ընկերությունների գործունեությունը: Սակայն, ՏՄՊՊՀ մամուլի քարտուղար Գայանե Սահակյանն այսօր ԱրմԻնֆո գործակալությանը տեղեկացրել է, որ ուսումնասիրությունների արդյունքները ցույց տվեցին, որ ձվի գները չեն բարձրացել: Իսկ ձկան գները, նրա կարծիքով, բարձրացել են միայն ՍԱՍ սուպերմարկետներում, ընդամենը 4-5%:

 ՙՔաղաքական ճգնաժամի հաղթահարման պայմանները, որոնք ես ներկայացրել եմ Հայաստանի իշխանություններին, անքակտելի են՚, - հայտարարել է ՙԺառանգություն՚ կուսակցության առաջնորդ Րաֆֆի Հովհաննիսյանը այսօր Ազատության հրապարակում մամուլի ասուլիսի ժամանակ:

Նրա ասելով, նախագահ Սերժ Սարգսյանի օրինականությունը ճանաչելու համար իր ներկայացրած պայմանները նվազագույն շեմն են, և եթե հնարավոր բանակցությունների ընթացքում պետության ղեկավարը որոշի հանել կետերից թեկուզ մեկը, ապա նա պետք է ավելացնի իր` նախորդին համարժեք կետը: Հովհաննիսյանը կարծում է, որ ՙԺառանգությանն՚ իշխանության հետ գործարքի համար մեղադրող մարդիկ իրենք են գնացել այդ գործարքին: Ավելին, Հովհաննիսյանի առաջ քաշած պայմանները ոչ թե կառավարությունում իրեն պաշտոն տալու խնդրանք են, այլ երկրում իրական իշխանությունը ժողովրդի և երկրի պաշտոնական իշխանության միջև բաժանելու միջոց: ՙԵս ուրախ կլինեմ, եթե Սերժ Սարգսյանն ինձ հետ հանդիպի Ազատության հրապարակում: Քանի դեռ մեր պայքարը չի մոտեցել տրամաբանական հանգուցալուծման, ես այս հրապարակը չեմ լքի: Իմ բնույթն ու խիղճն ինձ թույլ չեն տալիս գնալ իշխանությունների հետ մութ գործարքների, ամեն ինչ կարվի բացահայտ և թափանցիկ՚, - հայտարարել  էՀովհանննիսյանը, ով Ազատության հրապարակում հացադուլի 17-րդ օրն է անցկացնում: